كل ما تحتاجين معرفته عن الستروبنق (Strobing)

ماهو الستروبنق

الـسـلام عـلـيـكـم ورحـمـة الله وبـركـاتـه

خلال  الكم سنة الماضية كان الكونتور هوس عند محبات المكياج (ولا زال)، لكنه يعتبر ثقيل نسبياً ومناسب للمكياج المسائي، وطبعاً أخذ وقته حتى انتشر وتعلموه البنات ..

(كتبت في الماضي موضوع شامل عن الكونتور، تفضلي هـــــنـــــا لمشاهدة الموضوع) ..

أما الآن فقد بدأت موضة الـسـتـروبـنـق لتاخذ مكان الكونتور 😐

كونتور وهايلايت، ستروبنق هو الكونتور الجديد

😀

***

مـــاهــو الـسـتـروبـنـق ؟

الستروبنق أو Strobing هو مسمى حديث لشيء موجود أساساً في نظام مكياجنا الحديث، ألا وهو الـهـايـلايـت الشيمر (اللامع) 🙂 ..

انسي الكونتور وركزي على الهايلايت المكثف .. وبس

مثل ما نعرف الهـايلايت الشيمر (أو الستروبنق عشان نصير عالموضة XD ) هي طريقة تسليط الضوء على مناطق معينة لإبرازها بعكس الكونتور (تظليل الوجه لنحته)، هذي اللمعة بتعطي الوجه لوك ديوي (نضر) وشبابي جميل وملائكي (على قولة الأجانب :\ ) ..

مكياج ديوي، مكياج دوي، مكياج نضر، ميكب ديوي

***

هــل هــو مــنــاســب للــجــمــيــع ؟

الستروبنق له جوانب غير مرغوبة عند البعض، مثل اللي بشرتهم دهنية راح يتعبون شوي لأن مع الوقت البشرة بتبدأ تفرز الدهون وبالتالي بتصير لمعة إضافية غير الستروبنق، مما يجعل الوجه يوحي بالعرق، لكن هذا ما يمنع أنهم يعملون الستروبنق بشكل صحيح (الشرح في الأسفل) ..

برضو مثل ماقلت سابقاً الستروبنق هو الإكتفاء بالإضاءة والبلشر فقط (كونتور لأ – برونزر لأ)، يعني البنت اللي وجهها عريض ومتعودة تسوي نحت بالكونتور عشان تصغره، يمكن ما رح تعجبها هالتقنية لأن احتمال يبان الوجه أعرض ..

اللي عندها مسامات واضحة ضروري جداً تحضر بشرتها زين قبل المكياج عشان الستروبنق ممكن يبرزها وتكون واضحة (اعملي ماسكات\استخدمي برايمر قبل المكياج) ..

إذا كنتي تعانين من حب الشباب يفضل لو تخلين مكياجك على الجانب المطفي لأن الإضاءة راح تبين شكل الحبوب مهما حطيتي كونسيلر واخفيتي .. الإضاءة بتفضحك ..

***

مــا هــي الـخــطــوات الــصــحــيــحــة للــســتــروبــنــق ؟

– الـترطيب ثم الـترطيب ثم الـترطيب، أي لوك ديوي لازم تكون البشرة مترطبة زين لأن هذا اللوك يعتمد على نضارة البشرة وتوهجها الصحي، ذات البشرة الدهنية و المختلطة اختاري كريم مرطب خالي من الزيوت ..

هايلايت كريمي

بعض أنواع الهايلايت الكريمي

– خطوة اختيارية (للبشرة الجافة والعادية)، بعد البرايمر وقبل كريم الأساس حطي هايلايت كريمي على المناطق المرغوبة (المناطق المحددة موضحة بالصورة في الأسفل)، ثم حطي فاونديشن مع مراعاة الطبطبة على مناطق الهايلايت عشان ما نحركها من مكانها، إذا كانت بشرتك دهنية أو مختلطة اتركي هالخطوة وروحي على طول لوضع الفاونديشن بشكل عادي ..

بالنسبة لبودرة التثبيت ثبتي الكونسيلر والمناطق اللي مافيها هايلايت فقط (حول الأنف وليس عظمته) ، مناطق الهايلايت ابعدي عنها البودرة ..

نـصـيـحـة:  للمحافظة على مظهرك خلال اليوم خلي معك بودرة لإطفاء لمعان الأماكن اللي مانبغى فيها لمعة مثل حول الأنف ..

***

ستروبنق كريمي على حسب درجة البشرة

***

– بعد ما خلصنا من الفاونديشن والكونسيلر، نوجه تركيزنا على الستروبنق.. بعد اختيار الهايلايت الكريمي المناسب نستخدم أصابعنا لوضع أساس للهايلايت على المناطق الموضحة أدناه ..

كيف نسوي نحط الستروبنق

صورة توضيحية للمناطق الصحيحة للستروبنق

– باصبعك ضعي بلمسات ناعمة هايلايت فوق الحاجب وتحته (مع الدمج البسيط) ..

– على الزاوية الداخلية للعين ..

– على عظمة الخد (على شكل C ابتداءاً من نهاية الحاجب حتى عظمة الخد، توقفي تحت البؤبؤ تماماً) ..

– لإيعطاء إيحاء بأن أرنبة الأنف مرفوعة نحط عليها هايلايت وندمجها للأعلى على جسر الأنف، البنات اللي عندهم بروز بعظمة الأنف حطوا فوق وتحت البروز فقط (ليس على البروز نفسه) عشان نخفيه ..

– فوق الشفاة حتى نعطيها إيحاء بالامتلاء ..

– منتصف الذقن ..

– نحط البلشر كالمعتاد ..

نـصـيـحـة:  حاولي تقتصرين الشيمر على الستروبنق فقط، يعني الفاونديشن و البلشر يفضل لو كان مات (مطفي) عشان تكون اللمعة في الستروبنق ..

– نجيب هايلايت شيمر بودرة، وبالفرشة نعيد على نفس الأماكن السابقة، هالخطوة بتثبت الهايلايت الكريمي وتكثفه ..

هايلايت اضاءة شيمر بودرة

***

– قبل ما ننهي كل شيء، نرش (Fix Plus من ماك) أو ماء ورد على كامل الوجه ونتركه يجف تماماً ..

فيكس بلس ماك، فكس بلس ماك، مثبت

هذي الخطوة هي سر نجاح الستروبنق لأنها بتدمج الهايلايت مع البشرة وبتعطيها شكل طبيعي ..

***

ستروبنق جسم، ستروبنق للجسم

– إذا عندك مناسبة وحابة تكملين الستروبنق على جسمك، كرري نفس الخطوات السابقة على عظمة الترقوة \ أعلى الصدر \ نهاية الكتفين ..

*

*

*

*

و بـــس ،،، بلا كنتور بلا كلام فاضي هههههههههههه

XD

هذا كل ما يخص تقنية الستروبنق الجديدة ( يلا بانتظار الموضة الجاية :\ )

ألقاكم على خير بإذن الله ..

مدونة بيلانوفيلا

Advertisements

مكياج مميز بأيلاينر القليتر

قليتر أيلاينر

مــرحـــبـــــا

مكياج اليوم لماع X لماع 🙂

لكن جميل جداً باستخدام أيلاينر نسويه من بيقمت القليتر العادي ..

*

*

لموضوع أساسيات المكياج (فاونديشن إلخ..) تفضلي هـــــنـــــا

لموضوع الكونتور بالتفاصيل، تفضلي هـــــنـــــا

لمشاهدة الدليل الشامل لفرش المكياج تفضلي هـــــنـــــا ..

*

*

((اضغطي على الصور لتكبيرها))

3

  • بعد ما نحط برايمر العيون أو الكونسيلر، نبدأ بشادو بني مات وندمجه بفرشة دمج على كسرة العين ..
  • ثم بفرشة دمج أكبر ندمج شادو بني فاتح مات على نفس المنطقة ..
  • نحط هايلايت شيمر تحت الحاجب تماماً ..
  • بالاصبع نحط شادو كريمي لونه بين الفضي والذهبي (الصورة: fringe من colorpop) ونحطه على الجفن المتحرك ..

***

4

  • نرجع للبني السابق ونحطه أسفل العين، ثم نرجع للبني الفاتح وندمج اللي حطيناه ..
  • قبل ما نستخدم القليتر نحتاج أساس عشان يكون اللون واضح، بنرسم العين بأيلاينر بني ..
  • عشان نسوي أيلاينر قليتر بنحتاج بيقمنت نحاسي ونخلطه مع شوي fix plus أو قطرة انجلوت، بيصير عندنا قليتر سائل نحطه على الأيلاينر السابق ..

***

5

  • بفرشة صغيرة نحط بيقمنت أبيض أو فاتح عموماً ونرش عليه fix plus ونحطه على الزاوية الداخلية للعين ..
  • ثم يجي دور الماسكرا والرموش الصناعية السفلية والعلوية، تفضلي هـــــنـــــا للتفاصيل ..
  • ونختار روج يكون ناعم بلون وردي أو نيود .. وبس ..

*

*

1

أتمنى يكون اللوك عجبتكم

🙂

مدونة بيلانوفيلا

مكياج السموكي الكلاسيكي

سموكي أسود

Hello My Beautiful Friends

على كثر ما غيرت بستايلات المكياج مالي غنى عن السموكي التقليدي الكلاسيكي، طبعاً ما ينفع إلا لسهرة لأنه ثقيل لكن جــمــيــل و يعطني نظرة ساحرة للعيون 🙄

***

للاطلاع على أساسيات المكياج قبل كل مكياج من أساس إلخ تفضلي هـــــنـــــا ..

لخطوات الكونتور والهايلات تفضلي هـــــنـــــا ..

لمشاهدة الدليل الشامل لفرش المكياج تفضلي هـــــنـــــا ..

***

((اضغطي على الصور لتكبيرها))

سموكي كلاسيكي

نبدأ ببرايمر العيون (كونسيلر لو ماعندك)، بعد ما نوزع البرايمر ناخذ شادو بني فاتح مطفي ونوزعه على الجفن إلى تحت عظمة الجفن وعلى أسفل العين ..

ثم نحط شوي شادو شيمر كإضاءة تحت الحاجب ..

***

دخاني كلاسيكي

بفرشة مسطحة صغيرة نحط شادو أسود مات على الجفن المتحرك فقط وعلى منابت الرموش السفلية (لا تنسين تهزين الفرشة قبل الوضع عشان يطيح الشادو الزايد) ..

لدمج الأسود تحت العين ناخذ فرشة مدببة ونرجع للبني الفاتح وندمج بشويش ونحاول ما ننزل اللون الأسود بشكل مبالغ ..

نكحل داخل العين بقلم الكحل الأسود، أو إذا كانت عينك صغيرة باللون البيج ..

***

مكياج سهرة

لنكسر حدة الأسود على الجفن الثابت ناخذ فرشة دمج واللون البني الفاتح السابق وندمج ..

ثم ناخذ بنفس الفرشة شادو بلون البني المحمر (مات) وندمج على عظمة الجفن ..

نرسم بالأيلاينر فوق العين، للتفاصيل تفضلي هـــــنـــــا ..

نحط المسكرا ثم نركب الرموش اضغطي هـــــنـــــا للتفاصيل، أو تكتفين بتكثيف المسكرا ..

***

نختار روج لحمي أو وردي فاتح وبس ..

ميكب سهرة

*

*

*

أتمنى يكون عجبكم اللوك 🙂

شكراً لمتابعتكم ودعمكم ..

مدونة بيلانوفيلا

بخصوص الناس اللي يسرقون مقالاتي

السلام عليكم ورحمة الله وبركاته

من كم يوم صارت تجيني على مدونتي تنبيهات من الـووردبرس أن فيه أحد ينسخ مواضيعي ويحطها في موقع معين ..

زرت هذا الموقع وفعلاً لقيت مقالاتي منشورة هناك أول بأول، يعني أكتب موضوع اليوم ألقاه بعد كم ساعة هناك ..

حاولت أتواصل مع أصحاب الموقع وطلعوا ناس قليلين ذوق وتجاهلوني ..

بــس حــابة أقول لزواري الكريمات أن أي موضوع أو أي صورة عليها شعار المدونة شافوها في غير مدونتي فـهـي مـــســروقـــــة

مثل ما نوهت في صفحة التعريف حقتي .. بعض وليس كل المواضيع مأخوذة من اليوتيوب، وجــمــيــع الــصور أنا اللي سويتها (كلها كانت فيديو ونسقتها وسويتها صور)

و إذا قلت صور فأنا لقيت الإنستقرام مليان صور مأخوذة من موضوع (الكونتور) ومنسوبة للشخص اللي حاطها في حسابه، عشان كذا اضطريت أحط الشعار على كل الصور لأن اللي انسرق كان قبل ما أحط الشعار عليه ..

بيلا نوفيلا bella novela

أشكر متابعاتي وأقدر أي وحدة زارت مدونتي وقرأت مواضيعي

ما كتبت هذا البوست إلا لأن حاجة تقهر أنك تسوين شيء لقراءك وتلقين ناس ياخذون شغلك عالجاهز ..

حـسـبـي الـلـه ونـعـم الـوكـيـل

بس على فكرة نسبة زواري زادوا لأن الناس عملوا بحث لـBella Novela بسبب الشعار ..

رب ضارة نافعة صح؟ 🙂

الخطوات الأساسية لأي مـكـيـاج

كريم الأساس

بـسـم الله الـرحـمـن الـرحـيـم

كثير بنات يسألون عن الخطوات الصحيحة لأساسيات المكياج ويبغون الشرح الوافي لهذا الموضوع وبالترتيب (خاصةً المبتدئات بالمكياج) ..

أساسيات المكياج

إليك عزيزتي هذا الموضوع الشامل عن كل شيء يخص الفاونديشن والكونسيلر و كيف تخلين بشرتك صافية ومثالية بالمكياج ..

أنا رح أفصل الخطوات كاملة ومو ضروري تسوينها كلها (على حسب رغبتك) ..

***

تـقـشـيـر الـبـشـرة و الـشـفـاة

طبعاً تحت كل طبقة قشور تكمن البشرة الجميلة الملساء، لذلك يُنصح تقشير البشرة قبل المكياج (التقشير اليومي البسيط) والسبب هو أن قشور البشرة بتكون واضحة مع الفاونديشن ( أكلمك يا صاحبة البشرة الجافة 🙂 ) ..

تقشير البشرة

اختاري المقشر المناسب لبشرتك، أنا شخصياً بشرتي جداً جافة عشان كذا يناسبني غسول فيتامين E مع الفرشة الصغيرة أو الليفة الصغيرة (كلهم من البودي شوب ولا تخافين الفرشة والليفة ناعمة وما تألم أبداً ههههههه)، ابتعدي عن منطقة العيون ..

تـذكـري:   بـشـرة جـمـيـلـة = مـكـيـاج جـميـل

و مـا نـنـسـى الـشـفـاة

فيه أنواع كثيييير لتقشير الشفاة لكن أسهل شيء هي أنك إذا خلصتي من أسنانك كملي على شفايفك بالفرشة هههههههههههه ) طبعاً بعد ما تغسلين المعجون من الفرشة عشان ما تسود بالشفايف) ..

أساسيات المكياج

بعدين حطي فازلين عشان بعد ما تخلصين من كل شيء تكون شفايفك مترطبة ومستعدة للــرووووج 🙂

***

الـتـرطـيـب ثم الـبـرايـمـر

ترطيب البشرة

بعد تنظيف ضروري جداً استخدام الكريم المرطب للبشرة والعيون عشان ما ترجع تتكون القشور (كل أنواع البشرة من دون استثناء) ..

نصيحة:  إذا حطيتي كريم العيون اتركيه حتى يتشرب في البشرة وكرري العملية كذا مرة، هذي الطريقة بتخلي منطقة العيون مترطبة جيداً وبالتالي الكونسيلر ماراح يدخل في التجاعيد ..

بعد ما تتشرب البشرة المرطب نحط البرايمر ( تكلمت عنه هــــنـــــا )

***

الــكــوريــكــتـر (مـصحـح الـلـون)

مصحح اللون

هذي الخطوة اختيارية، وهي للي عندهم عدم توحد شديد للبشرة زي البشرة السمراء أو للي عندهم هالات سوداء غامقة و ممكن تقلب  رمادي في المكياج ..

الكوريكتر هو الإعتماد على ألوان معينة لإلغاء ألوان غير مرغوبة في البشرة زي اللون البرتقالي أو السلموني لإلغاء السمار الشديد في البشرة (مثل عدم التوحد الشديد حول الفم أو الهالات السوداء)، أو اللون الأخضر لإلغاء الإحمرار الشديد (زي إذا عندك حبوب) ..

والطريقة إنك تحطين على الأماكن المرغوب توحيدها فقط وليس كامل الوجه، استخدام الكوريكتر يعتمد على مدى احتياجك له ..

( إذا ما كنتي تحتاجين هالخطوة انتقلي للخطوة الثانية مباشرة )

***

كــريــم الأســــاس

هو الأساس اللي يتوزع على كامل الوجه والرقبة وله أنواع ..

الفاونديشن

تتنوع التغطيات من خفيفة إلى متوسطة إلى عالية وكلها على حسب رغبة كل امرأة ..

فيه ناس يحبون يحطونه بعد ميك أب العيون وفيه ناس (مثلي) يحبون يحطونه قبل، اعتمدي الترتيب اللي يناسبك ..

توجد أساليب مختلفة لتوزيع الفاونديشن:

أصابع اليد فرشة اسفنجة (لازم تبلليها وتعصرينها قبل استخدامها عشان ماتتشرب الفاونديشن) ..

لمشاهدة الدليل الشامل لفرش المكياج تفضلي هـــــنـــــا ..

أساسيات المكياج

بغض النظر عن الأسلوب المتبع لتوزيع كريم الأساس، ضروري تدمجينه مع البشرة عشان يتوزع بالتساوي ويبان شكله مرتب (لا تنسين الرقبة) ..

***

الــكــونــســيــلــر

وهو مصحح العيوب، ومثل كريم الأساس تتنوع تغطيته على حسب احتياجات كل وحده ..

أساسيات المكياج

و برضو مثل الفاونديشن فيه ناس يحبون يحطونه قبل مكياج العيون وفيه ناس (مثلي) يحبون يحطونه بعد ..

أنصحك تحطينه بعد مكياج العيون لأن فيه احتمال أن الشادو يتناثر تحت العين و بيكون أسهل لك التنظيف إذا خليتيه بعد مكياج العيون ..

أفضل طريقة لتوزيع الكونسيلر هي الطبطبة بالأصبع (البنصر) وهذا لأن حرارة الجسم بتخلي الكونسيلر يندمج بشكل جميل ..

***

الــكــونــتــور (نحت الوجه)

إذا كنتي حابة تسوين هالخطوة تفضلي اقرئي موضوعي الكامل عن الكونتور هـــــنــــا ..

(إذا ما تبغين تسوين كونتور استمري للخطوة الجاية)

***

التـثـبـيـت بـالـبـودرة

بودرة تثبيت الفاونديشن

طبعاً التثبيت بالبودرة بيكون من اللمسات الأخيرة للمكياج، يعني لنفرض أنك خلصتي العيون بيكون هذا الوقت المناسب للتثبيت ..

للبودرة أنواع: المضغوطة (كومباكت) و السائبة (لوس)، بالنسبة لي أحس ما فيه فرق بينهم, كلهم بيعطونك نفس النتيجة، لكن الإختلاف هو بنوعية البودرة (هل هي العادية، المعدنية أو الخاصة بالبشرة الدهنية) ..

معلومة:  انتشرت مؤخراً بودرة الـHD وهي رائعة لتصوير الفيديو لكن انتبهي انتبهي انتبهي تحطينه إذا ناوية تتصورين تصوير فوتوغرافي لأن بيظهر لون أبيض على وجهك (ما يبان بالعين المجردة لكن في الصور الفلاش بيخليه زي الطحين على وجهك) ..

أساسيات المكياج

***

A- الــبــرونــز

خطوة اختيارية لكنها حلوة وبتعطيك لوك صحي وسنحه برونزية جميلة ..

B- الــبــلــش (أحمر الخدود)

ضروري جداً لأن كريم الأساس بياخذ من لون خدودك وبيخلي وجهك لون واحد عشان كذا البلشر بيعطيك لون لوجنتيك 🙂

C- الـهـايـلايـت (الإضاءة)

صار من ضروريات المكياج لأنه يعطي البشرة لوك صحي ونضر ..

اضغطي على الصورة التالية للتعرف أكثر على البرونز-بلش-الهايلايت ..

أساسيات المكياج

***

و بــكـذا نـكـون انـتـهـيـنـا مـن أسـاسـيـات كـل مـكـيـاج ..

🙂

بيلا نوفيلا bella novela