مناكير بشعار الشريطة الوردية

الحملة الوطنية للتوعية بسرطان الثدي

الـسـلام عـلـيـكـم و رحـمـة الـلـه و بـركـاتـه

مثل ما تعرفون شهر أكتوبر هو الشهر اللي تقام فيه الحملة التوعوية بسرطان الثدي (الله يبعده عنا) ، وبهالمناسبة حبيت أشارك لو بشيء بسيط ..

الشريطة الوردية هي شعار الحملة ،، وهـذا الموضوع مستوحى من هذي الحملة ..

***

مناكير وردي

الأدوات

–  مناكير وردي ..

–  مناكير nail art المخصص للرسم على الأظافر بلون فوشيا ..

–  مناكير أبيض ..

–  مناكير قليتر وردي ..

–  فرشة للرسم على الأظافر ، أو أي فرشة للرسم من المكتبات ..

و طبعاً ما ننسى نحط طبقة من المناكير الشفافة كحماية للأظافر ..

***

الإبــهــام و الــوســطــى

الحملة الوطنية للتوعية بسرطان الثدي

–  نحط مناكير أبيض ونتركه يجف تماماً ..

–  بالمناكير الفوشي نرسم خطين متعاكسين كما هو واضح بالصورة ..

–  بفرشة الرسم نرسم خطين بالمناكير الوردي كما هو واضح بالصورة ..

***

الــســبــابــة و الــخــنــصــر

الحملة الوطنية للتوعية بسرطان الثدي

–  نحط مناكير وردي ونتركه يجف تماماً ..

–  بالمناكير الفوشي نرسم خط معكوف كما بالصورة ..

–  ثم نرسم نفس الخط على الجهة المقابلة، بيطلع معنا شكل الشريطة ..

***

الــبــنــصــر

الحملة الوطنية للتوعية بسرطان الثدي

–  نحط مناكير وردي ونتركه يجف تماماً ..

–  نحط المناكير القليتر (عشان تركزين القليتر على الإظفر حطي المناكير بالطبطبة أوالتربيت) ..

***

بعد ما تجف كل الأظافر نحط طبقة مناكير شفافة عشان تعطي لمعة للمناكير ..

وبهذا نكون خلصنا ..

الحملة الوطنية للتوعية بسرطان الثدي

*

*

*

Spread The Word 

خلونا نتعاون و ننشر حملة التوعية بسرطان الثدي لأن كثير من السيدات ما عندهم خلفية بهالموضوع ..

الله يحفظنا جميعاً

الحملة ضد سرطان الثدي

Advertisements

مكياج ناعم على طريقة Kylie Jenner

Hello My Beautiful Friends

من فينا ما صارت تعرف عائلة كـارداشـيـان الموقرة  🙄 ..

بالنسبة لي فايدتهم الوحيدة بالحياة هي الظهور بإطلالات جذابة سواء بالملابس أو المكياج ..

طبعاً اللي دائماً ماكلة الجو بستايلاتها هي كـيـم كـارداشـيـان، لكن من فترة طلعوا خواتها الصغار من جهة أمها وهم كـيـنـدل جـيـنر (عارضة أزياء)، و كـايـلـي جـيـنر اللي اشتهرت بطريقة مكياجها الهادية والناعمة ..

كايلي جينير، كايلي جنر، كايلي جينر

مثل ما انتوا شايفين الميك أب جداً بسيط لكنه يبرز قسمات الوجه الجميلة ..

اخت كيم كارداشيان

بلمسات بسيطة تقدرين تنفذين هذا اللوك لأغلب المناسبات ..

*

*

البداية أكيد بتكون بوضع برايمر الوجه والفاونديشن، الخطوات بالتفاصيل هـــــنـــــا ..

و هذا اللوك واضح فيه أنها مسوية كونتور للوجه، الخطوات بالتفاصيل هـــــنـــــا ..

لمشاهدة الدليل الشامل لفرش المكياج تفضلي هـــــنـــــا ..

***

((اضغطي على الصور لتكبيرها))

مكياج كايلي جينر اخت كيم كارداشيان

بعد برايمر العيون نحط شادو بني فاتح على كسرة العين باستخدام فرشة دمج، ثم بنفس الشادو نحط على الرموش السفلية بفرشة دمج صغيرة ..

ناخذ شادو بني غامق تقريباً ونحطه على الزاوية الخارجية للعين (تحت اللون السابق)، ثم ندمج ندمج ندمج ..

بعدين بفرشة صغيرة نحط إضاءة على الزاوية الداخلية للعين وتحت الحواجب ..

***

اخت كيم كارداشيان

نرسم خط بسيط بالآيلاينر، الموضوع الشامل للآيلاينر هـــــنـــــا ..

طبعاً كـايــلــي تكحل عينها من داخل بالأسود أو اللحمي، اختاري اللي يناسبك وترتاحين فيه وحطيه 🙂 ، بعدين يجي دور المسكرا ..

وطبعاً لا تخلوا أي إطلالة للآنسة كـايـلـي جـيـنـر من الرموش الصناعية، لأن بساطة المكياج لوحدها لا تكفي، لخطوات الرموش المفصلة هـــــنـــــا، ولزيادة الإبهار حطي مسكرا بعد ما يجف صمغ الرموش ..

إذا كنتي تبغين لوك أكثر بساطة اتركي هالخطوة واكتفي بالمسكرا فقط ..

***

خوات كيم كارداشيان

اختاري بلشر مشمشي عشان يطلع طبيعي على البرونز اللي حطيناه بخطوة الكونتور، ولا تنسين الإضاءة عالخدود ..

بالنسبة لمسألة الروج اللي دوخت البنات و يبون يعرفون بالضبط كـايـلـي إيش تستخدم .. أقولكم ترا السوق مليان أشياء مشابهة ومــو شرط تجيبون نفس المنتجات اللي تستخدمها لأن أبشركم السووووق فااااااضي منها ( صدقوني لفيت الأسواق وكلهم يقولون خلصت 😥 )

ألااااا وهي :

محدد سوار من ماك (أساساٌ اسمه سور لكن هنا يسمونه سوار لكن ماعلينا)، محدد ويرل من ماك، محدد سبايس من ماك، روج فيلفيت تيدي من ماك (الروج موجود الحمدلله وهو لحمي مطفي) أما المحددات عليكم بالعوض لأنها بـــــــــح 👿

جيبوا أي محدد جاي على وردي وحددوا على الخط الخارجي للشفايف، ثم لونيها بالكامل بعدين حطي روج بنفس اللون مطفي ..

و بــــــس

***

kylie jenner

اللوك رح يناسب الــكــل من دون استثناء

أتمنى يكون عجبكم لوك اليوم ..

استنوني قريب بموضوع جديد ..

أحــــوووووووبـــــكــــــم 😀

مدونة بيلانوفيلا

Who Wore It Best

nicki minaj kim kardashian west shailene woodley

صوّتي للطلة الأحلى

قلم الآيلاينر Push-Up Liner الجديد من بنيفت

benefit push up liner

مــــرحــــــبـــــــا

من كم يوم استلمت من بنيفت/سيفورا الآيلاينر (الثوري على قولتهم) الجديد Push-Up Liner.. وهذا الريفيو عنه :

*

*

كات أيز

هذا الكحل فريد من نوعه لأنه من نوع الأيلاينر الجل (و هو بالعادة يكون في علبة صغيرة ونستخدمه بالفرشة)، لكن Benefit ابتكرت هذا التصميم المشابه للقلم مما يسهل استعماله (برااااافو لأن فعلاً بحركة وحدة سويت كات أيز مضبوط 🙂 )

مجرد تفرين الجزء السفلي للقلم يطلع الجل من المطاط اللي يشبه الفرشة المشطوفة ..

بنيفيت أيلاينر

بالنسبة للمنتج نفسه فهو تابع لمجموعة They’re Real اللي اشتهرت منها المسكرا (أحبها للإستخدام اليومي، طبيعية وتعطي طول للرموش) ..

benefit liner

المجموعة مكونة من المسكرا – الأيلاينر – مزيل مكياج العيون ..

اللي يميز هذي المجموعة إنها ضد الموية ومناسبة جداً للصيف والأجواء الرطبة (نطي بالمسبح واطلعي انتي زي ما انتي ههههههه) ..

أيلاينر بنيفيت الجديد

الحلو في هذا القلم إنه بيساعدك في تحديد مكان رسمة الأيلاينر (انظري الصورة الأولى) يعني أي وحدة عندها صعوبة في رسمة الأيلاينر رح يعجبها هذا الكحل أكـــــيــــــد ..

و برضو من الأشياء اللي عجبتني فيه إن المطاط يخليك تتحكمين بسمك الرسمة، وأن فيه خاصية تخليه يرسم على منابت الرموش بترتيب ..

للأمانة في البداية بتحسينه يتكتل لكن مع الاستعمال المنتج اللي داخل بيكون أفضل من اللي طلع معك في بداية فتح العبوة، حاولي تشتغلين بسرعة لأن الكحل ينشف بسرعة ومثل ما قلت هو ضد الموية يعني بتطفشين وانتي تعدلين فيه.. غير كذا نهاية الكات أيز بتكون شوي عريضة مثل الصورة اللي فوق (لكن إذا كنتي تحبين النهاية النحيفة عدليه بالأيلاينر السائل) ..

*

*

هذا المنتج رح يتوفر حول العالم على شهر يوليو القادم (ما أدري إذا السعودية من ضمنهم) ..

الزبــــــــدة :

لااااااا يـــفـــوتــــكــــــم ، شخصياً مرة عجبني .. لكن هذا رأيي 🙂

***

للإطلاع على الموضوع الشامل للأيلاينر اضغطي هـــــنـــــا ..

“Have a great day”

مدونة بيلانوفيلا

الفازلين.. وما أدراك ما الفـازلـيـن

vaseline

الــســلام عــلــيــكــم و رحــمــة الــلــه و بــركــاتــه

جيلي البترول أو المعروف باسم الفازلين هو منتج مستحضرات التجميل الأكثر استخداما في المنازل حول العالم ..

له استخدامات رهيبة، والتي يمكن أن تساعدك في الحياة يوما بعد يوم ..

*

*

الــوجــه

  • للبشرة الجافة جداً، يمكن تدفئة شوي من الفازلين واستخدامه ككريم ليلي ..
  • استخدامه كمزيل للمكياج، وفي نفس الوقت يرطب البشرة ..
  • استخدميه مع الروج عشان تسوين بلشر كريمي لخدودك ..
  • إذا حطيتي مكياج ممكن تحطين منه أعلى الخدين عشان يعطيك لوك دوي للبشرة (نضر) ..

***

الــعــيــون

إطالة الرموش

  • ليلاً حطي فازلين على أطراف أصابعك وامسحي على رموشك وعلى كامل جفونك وأسفل عينيك (ونوم العوافي 🙂 )، بهذي الطريقة رح تضربين عصفورين بحجر.. أولاً حماية العيون من التجاعيد المبكرة وترطيبها، وإطالة الرموش وتغذيتها (شخصياً لاحظت الفرق في رموشي) ..

فازلين

  • لإزالة مكياج العيون حطي على قطنة وامسحي الجفون واتركيها دقيقة تقريباً بعدين امسحي بقطنة نظيفة ..
  • إذا كانت الرموش الصناعية ناشبة على عينك هههههههه حطي فازلين وبيتفكك الصمغ ..
  • إذا كانت حواجبك كثيفة وتبغين تثبتينها في مكانها مشطيها بشوي فازلين ..
  • إذا كنت تستخدمين شدو سائب حطي مسحة بسيطة بالفازلين ورح يثبت، وبيعطيك لمعة حلوة تحت الشدو ..

***

الــشــفــاة

شفاة شفايف

  • لشفاة ناعمة وطرية حطي فازلين على شفايفك ..
  • تقدرين تحطين معه سكر وتسوين مقشر للشفايف ..
  • تقدرين تخلطين معه شدو أو بلش بأي لون تبين وتسوين لك قلوس حلو ..
  • أو تخلطين معه بودرة شوكولاتة ويصير عندك مرطب بالتشوكليت 🙂 ..
  • إذا عندك مناسبة و بتبتسمين كثير، حطي طبقة على الأسنان عشان ما تلصق الشفايف عليها، وبرضو هذا الشيء بيمنع تبقع الأسنان بالروج (الفنانات وملكات الجمال يسوونها) ..

***

الــشــعــر

  • قبل وضع صبغة الشعر أو كريم الفرد ضعي القليل من الفازلين على فروة الرأس عشان ما تسببلك المواد الكيميائية الموجودة فيها أي تهيج في الفروة ..
  • إزالة العلك من الشعر ضعي الفازلين على الشعر وملسيه عليه حتى تنزلق العلكة ..
  • لإخفاء تقصف الشعر (أطراف الشعر المنقسمة) حطي شوي على اصبعك وامسحي عليها ..
  • لمنع دخول الشامبو في عين الطفل، امسحي الفازلين فوق الحواجب عشان ينحدر الماء من الجانبين ..

***

الــيــديــن

فازلين

  • لتنعيم اليدين حطي فازلين والبسي قفاز بالليلل قبل النوم، ممكن تسوين هذا الشيء مرة أو مرتين اسبوعياً ..
  • دلكي أظافرك بالفازلين ليلاً لو كانت بسرعة تنكسر أو مقصفة فالفازلين يقويها ..
  • لتليين الجلد الميت حول الأظافر ..
  • إذا كان عندك صعوبة في فتح غطاء المناكير ضعي طبقة رقيقة من الفازلين على حافة الزجاجة ..
  • إذا كان الخاتم عالق بإصبعك غطيه بالفازلين ثم اسحبي الخاتم ..

***

الــقــدمــيــن

فازلين للأقدام

  • لأقدام ناعمة نقعيها في ماء وصابون لعشر دقائق ثم افركيها بالحجر أو بالصنفرة، ثم جففيها وامسحيها بالفازلين وإلبسي شراب ..

***

الــجــســم

  • إستعملي قليلاً من الفازلين على كامل جسمك بعد الحمام لتحصلي على بشرة ناعمة لطيفة، اغسلي وجهك وبينما هو مبلول ادهنيه بكمية صغيرة من الفازلين واصلي دهن وجهك حتى يتشربه ولا يبدو وجهك دهنيا (تستمعل المنتجعات العلاجية هذا العلاج السري) ..
  • لتهدئة تهيج البشرة بعد إزالة الشعر ..
  • للمعتمرين أو الحجاج، وضعها بين الأفخاذ لمنع احتكاكهما خلال المشي، خاصة لذوي الأوزان الثقيلة ..
  • لأكواع وركب ناعمة نضع الفازلين يومياً، فعاليته أفضل من الكريم أو اللوشن العادي ..
  • ينفع لعمل المساج ..
  • اخلطيه مع ملح البحر و اصنعي مقشر للجسم ..
  • للوقاية من خشونة البشرة وجفافها في فترة الشتاء نحط الفازلين (خاصة على باطن الأقدام) ..
  • يلطف البشرة المصابة بالأكزيما ..
  • تقدرين تخلطين معه اللوشن أو الكريم المفضل عندك عشان تطول فعاليتها على البشرة أكثر ..

فازلين

  • لإطالة عمر العطر أو دهن العود، امسحي طبعة بسيطة جداً على المكان المراد رشه، ثم رشي العطر، بتقعد الريحة معك إلى الاسبوع الجاي ههههههههه ..
  • إذا كان عندك صعوبة بإدخال الحلق بإذنك حطي عليه شوي و بيزلق معك ..
  • إذا بغيتي تلمعين شنطتك أو الشوز (وانتوا بكرامة) امسحي شوي بمنديل ..

*

*

*

هذي بعض الإستخدامات الشخصية، هذا غير الأستخدامات في أنحاء المنزل ..

أتمنى يكون عجبكم الموضوع

ولا تنسون الإشتراك بالمدونة 🙂

مدونة بيلانوفيلا